Psa 103 | KYG | STEP | Nagupi mafa'neo, hu'na, Ala kava ne'mo agi'ale'mo alika asaga huvo. Muki nagufamo'e naipa nagesamo'e'mo aote ne'mo agi'ale'mo alino asaga hino.

Psalms 103

Ala kava ne'mo'a hau huno late'niya kavafe'mo ava gemae

1 Nagupi mafa'neo, hu'na, Ala kava ne'mo agi'ale'mo alika asaga huvo. Muki nagufamo'e naipa nagesamo'e'mo aote ne'mo agi'ale'mo alino asaga hino. 2 Nagupi mafa'neo, hu'na, alagepa huno naha mae'niya kavafe'mo kage okanika agi'ale'mo alika asaga huvo. 3 Agaemo muki hosu kava'nimo alino ataleteno muki kaita'nimo alino nahageno ne'nate. 4 Falisuva kavapati'mo miya faino hatu maeno ne'nate. Ala kava ne'mo'a ala nagi'nimo namiteno'ae'mo nagaefe'mo hau ayamopafi'mo hau'nigeno'ae'mo hau huno ne'nate. 5 Alagepa ya'mo alino ne'namigeno'ae'mo mago'e yafe'mo naipafati'mo ohau'niye. Naha ne'maege'nae'mo hakiki namamo neya vekagana huno mai'niya kava hu'na ne'mauve. 6 Ala kava ne'mo'a ali'a afepi apatage'a ne'maiya vaya'mo hapa maeteno apakai'api ya'mo alisayafe'mo alino apamigiye. 7 Agaemo aipafi'mo agesa afige hauge nehiya kava'amo Mosese'mo alino ave lige Isaleli vaya'mo hu'niya kava'amo alino apave lige hu'niye. 8 Ala kava ne'mo'a hau huno apatege fiku hapa maeno apamige vase vase huno aipamo leno apatege lusi kava huno hau ayamopafi'mo hauge huno ne'maiye. 9 Halate mago'e huno olahaugiya'monanafa muki afina'mo aipamo leno olategaiye. 10 Hosu kavatimo anonatilefe'mo magoke aiyaya huno nolamiye. Hosu kava'mo hu'nona kavatilefe'mo magoke aiyaya huno nolamagiye.

11 Koku'na'mo muga anagamo hane'niya kava huno agaefeke'mo koli hute'a mono nehaya vaya'aife'mo magoke aiyaya kava huno hau huno ne'apate. 12 Yegemo haine ne'eya aupilaga'e yegemo lamino nefaleya aupilaga'e'mo lusi afagi'ale'mo hane'niya kava huno Goti'a hosu kavatimo magoke aiyaya kava huno alino afagi'ale'mo yaga auno ne'atale. 13 Afo'apimogi mafa'ne anaga'apie'mo hapau hu'a ne'ataya kava huno Ala kava ne'mo'a agaefe'mo koli hute'a mono nehaya vaya'aife'mo hau huno ne'ate. 14 Agaemo, mopaleti'mo alo hu'na apate'nove. Mumusopaleti'mo alo hu'nova vaya'age'mo mai'nae, huno agesamo ne'afiya'mofe'mo lagaetegamo vase vase huno ali'ya'mo ne'aliye. 15 Kahaumo'mo aise afina'mo nehaneya kava huta ma mopafi'mo aise afina'mo maigeta nefalune. Kahau ausemo he'nigeno'ae'mo malage huno yasimo ne'aligeno'ae'mo falu teteno hali huno mopafi'mo asagauno ne'aiya kava huta aise afina'mo maigeta ago nefalune. 17 Nefaluna'monanafa Ala kava nefe'mo koli hute'a mono nehaya vaya'aife'mo ema akeya'vilagati'mo hau huno apateme apateme eno henaga'amo afole aisiya afina'e'mo hau huno apateme apateme uno hano osugiye. Agaemo laha ne'maeya kava huno alita apate'nonanage'a henaga'amo ali'a apateme apateme visaya mafa'nemogimo kotalake ge'amo akame hu'a ma kava'mo hiyo, huno hu'niya gemo ne'afiya vaya'mo hapa ne'mae.

19 Ala kava ne'mo koku'napi'mo mai'neno'ae'mo yagaino ne'ate. Muki asole vaya'aite'mo yagaino ne'ate. 20 Enisole vaya'mogitapae, hu'na, lokiya vaya'mo mai'netapa ge'amo afitetapa akame nehaya vaya'mogitapae, Ala kava ne'mo agi'ale'mo alitapa asaga hiyo.

21 Muki koku'napi mai'netapa ali'ya'amo ne'aliya vaya'amogitapamo hau'niya kava'mo nehaya vaya'mogitapae, hu'na, Ala kava ne'mo agi'ale'mo alitapa asaga hiyo. 22 Muki alo huno lapateteno muki ne'yagaiya kotegamo mai'naya vaya'mogitapae, hu'na, Ala kava ne'mo agi'ale'mo alitapa asaga hiyo. Nagupi mafa'neo, hu'na, Ala kava ne'mo agi'ale'mo alika asaga huvo.